لجنة الزكاة .. ونهاية الخلافات بعد مواجهة جميع الأطراف

بسم الله الرحمن الرحيم

بناء علي ما تقدم في الموضوعات السابقة

وهي ما رأيك في أعمال لجنة الزكاة؟؟

و مستندات لجنة الزكاة

وغيرها وهو ما أُضيف حديثاً

كان لابد من وقفة ولابد من مواجهة أطراف: مؤيدي اللجنة و معارضيها

لذلك قمنا نحن دكتور محمد أسامة الجوهري، دكتور خالد أمين زارع ، و مهندس كريم محمد حماد العشماوي بالذهاب للجنة ومواجهتهم بإتهامات الضمير ومشمش والعابد لله وهو الباش مهندس ابراهيم العلام.

وقمت أنا بدعوة الباش مهندس ابراهيم لمنزلي ولبى علي الفور الدعوة.

لذا فقمت أنا وحدي بمواجهة الطرفين.

في البداية أحب أن أوضح ان مش معني اني بدافع عن اللجنة يبقا الباش مهندس العلام شخصية وحشة لا الراجل محترم عاملته عن قرب وعرفت انه محترم عن قرب وكذلك أعضاء اللجنة. فقد قال لي الباش مهندس انا ههاجمهم ليه انا بيني وبينهم ايه ؟؟ وربي ما اتكلمت الا لما شفت مريض مش لاقي وملاقي تخاذل.إذا دافع يُحترم.وكذلك اللجنة يقوموا بأعمال تخدم البلد ويخرجوا في الشتاء في عز البرد في خدمة الناس وحل المشكلات.. إذا لهم إحترامهم.. ونحن هنا لنوضح الحقائق ليس إلا...

واليكم صور لي مع الطرفين

بسم الله نبدأ المناقشة وستكون نظامها كالتالي:

مهاجمات من طرف المهندس ابراهيم وردود من قبل اللجنة كالتالي:

فى مواجهتى مع المهندس إبراهيم قال لى أن ما أبعده عن لجنة الزكاة عدة نقاط كالتالي:

باش مهندس ابراهيم قال:

كنت معاهم فى يوم البيارة بتاعتى إتملت رحت حجزت الكساحة زيي زي أى حد وجدت إن دورى مش هييجى فقابلت الحاج محمد السيد فقلتله فإذا به على الفور يتصل بسائق الكساحه من تليفونه ويقول له إنت فين ؟ قال له أنا باخد دور لفلان قال له لأ روح بيت المهندس العلام وعلى الفور ذهب الولد حتى أن المهندس مش مصدق السرعه

سؤال البشمهندس أليست هذه محاباه لمن يعملو معكم؟؟

إجابة لجنة الزكاة:

كل ده حصل والمفروض دى حاجة تفرحه إننا بنساعده فى حل مشكلته ولو ربنا يقدرنا ونحل كل مشاكل الناس هنحلها وفى ملاحظة الباش مهندس عمره ماكان معانا فى لجنة الزكاة إطلاقا اللجنة متشكله ومعروفه أعضائها 9 أصليين ولجنه عمومية.

وعلى حد قول الباشمهندس هو كان بيساعدنا إنه كان بييجى معانا مشاوير بالعربيه وده لله.

الباشمهندس ابراهيم قال :

عبد الرحمن بركة إتصل وقال إنه مستعد يجهز عروستين من كل بلد فى مركز ميت غمر وطبعا يكونو يستحقوا المساعدة .

على الفور أبلغ الباش مهندس اللجنه انهم يجيبوا بيانات اتنين يستحقوا المساعدة

فقالت له اللجنه انه تم عمل اللازم يفاجأ البشمهندس ذات يوم ليلا ان ام احدى العرائئس ترن جرس منزله وتقول هات الالفين جنيه اللى انت خدتهم اللى هما الف لكل عروسه

فقال لها انا؟قالت له اه قال لها طيب اتفضلى واتصل بالحاج محمد وفتح السماعه الخارجيه السبيكرواسمعها ان الحاج محمد يقول له دا انا كنت بهزر معاهم هما جولك؟؟؟؟؟؟

رد اللجنة

البشمهندس ابراهيم هو اللى ودا المعلومات الخاصه بيهم لعبد الرحمن بركه وبناء عليه هو اللى كان متابع الموضوع واللجنة متعرفش اي حاجه فلما جات الست تسأل الحاج محمد ع الفلوس قال لها روحى للباشمهندس اسأليه

تعليق على الموقف منى

الست راحت بمكر الفلاحين قالت له هات فلوسنا الحاج محمد هو اللى باعتنى لتربك البشمهندس فطبعا اليشمهندس عمل اللى عمله سابقا اظن الصوره وضحت ياباشمهندس رد اللجنة واضح الموضوع كان معاك وملناش دعوه بيه.

النقطة الثالثة : الكساحة(غير المحاباة)... بيزينس خلف ستار لجنة الزكاة.

الباش مهندس قال:

قالولي يوما ما من الأيام لو عاوز تشتري كساحة علي حسابك الخاص وإحنا نشغلهالك بإسم لجنة الزكاةوإيرادها ليك كله مافيش مشكلة. والحاج فوزي البقري الله يرحمه منعه وحذره.

سؤال الباش مهندس : يعني ايه ايرادها ليا؟؟ مش دا شغل اللجنة وإيراده المفروض لحساب اللجنة؟؟؟ ولا إيه؟؟وتفسروا بإيه منع الحاج فوزي ليه؟

رد اللجنة:

هو قـال في عنصر المحاباه اننا بنحابيه علي حساب الناس إحنا ما بننكرش اننا طلبنا منه ده لكن مش بيزنس زي ما هو متصور لأ دا علشان الزحمة والكساحة الجديدة تساعد الشغاله ... ما فكرش هو ساعة ما كان مزنوق إن الكساحة مش ملاحقة لذلك هما قالوا له كمساعدة ان يبقا في كساحتين وبكده تتحل مشكله كبيرة من مشكلات البلد ... أظن رد مقنع .

أما من ناحية الإيراد طبعا لازم يكون ليك مش الكساحة انتا اللي دفعت فلوسها كلها يبقا كل ايرادها ليك ما عدا مصاريف الصيانة وأجور العاملين. عايز تدي للجنة بعد كدا من المكسب دي حرية شخصية وحاجة ترجعلك الحق حق. وبالنسبة للحاج فوزي دا مجرد رأي ومانعرفش نجيبه ونسأله لأنه مات ولحد ما مات كان الله يرحمه معانا ومشفناش منه إعتراض.

الباش مهندس قال :

راجل كان مريض -رحمة اللة - من غير ذكر أسماء - والباش مهندس قال كنت يوما كنت عند الحاج محمد بسيارتى وكان واقفا فى منزلة وانا بداخل السيارة فاتحا بابها ومخرجا رجلى خارجها علشان يبقى الكلام زى ماوصلنى بالظبط

أفاجأ برجل مريض يركب دراجة وجاء ينهج قائلاً : ادينى ياحاج محمد الشهرية بتاعتى (50 جنية ) فرد علية اذهب للشيخ حسام الراجل قال لة لسة جاى من عندة وقالى اجيلك

قال الحاج محمد لة عدى آخر الشهر

قال الرجل إحنا يوم 27 يعنى فى آخر الشهر

قال الحاج محمد : مافيش فلوس دلوقتى

قال الرجل : لو كان حد قريبك مش كنت هاتديلة

قال الحاج محمد امشى ياد يابن الـ .......شتيمة طبعاً.........

قال المهندس : غير كدة كان فية ناس بتديلة إتصل هو بيهم ومنعهم يدولة

رد اللجنة:

رد الأستاذ محمد غيث : موضوع الراجل دة وحالة كمان ذكروا فى مسجد السمانين والناس قالت للباش مهندس عيب ماتجيبس سيرة ناس ميتين لعدم التشهير ولإن لهم حرمة.

لأن في النهايه اللجنة ادت لهم فلوس .

رديت أنا قائلا بس معلش يوم ما إديته إديته 100 جنيه

رد قائلا إن شالله يكون جنيه واحد.

فوجهت الكلام للحاج محمد:

هو قالك أنا عايزهم دلوقت ماديتهومش له ليه؟؟

رد الحاج محمد: ما كانش في فلوس. قولتله طيب فين ايراد اللجنة يعني ما فيش 50 جنيه للراجل قال لأ. وقاللي إنتا فاكر إنه ما أخدش غير 50 جنيه دا كان الله يرحمه كل شوية في كشوفات بميه وبخمسين دا غير الأدوية وكان كتير ييجي ومافيش فلوس لحد ما هو بنفسه طلب وقال أنا عايز 50 جنيه شهريا ومش عايز حاجة تانية قالوله سهلة وما إتأخروش عنه . إلا فعلا لما ما كانش في فلوس . يعني الناس مش مقصرة.

فقولتله يا حاج محمد إزاي مافيش فلوس والباش مهندس بيقول ان في شيك اتودع بإسمك لحساب اللجنة بمبلغ 131 ألف جنيه ؟؟؟ كل دا وما فيش فلوس؟؟

قاللي لأ دي فلوس المشغل

وبكدا دخلنا في قصه الـ 131 ألف جنية والناس ما أنكروش الوصل وما قالوش انه متفبرك اللي قال كدا الأستاذ بس مش هما وحكالي الحكاية أقولكم عليها علشان الحق يظهر:

المشغل أول ما اتعمل كان منافسة علي مستوي الجمهورية بين 44 لجنة زكاة ( من الشرقية والغربية والدقهلية والاسماعيلية وغيرها) .

رسي العطا علي لجنة الزكاة بسنفا حيث تقوم اللجنة بعمل زي مدرسي لكل الـ 44 لجنة علي تكلفتهم الخاصة وعند التسليم تدفع كل لجنة مبلغ 3000 جنية تضاف في رصيد اللجنة ببنك ناصر فرع المنصورة .

اللجنة لكي تبدأ العمل تحتاج رأس مال كبير قامت الاستاذ محمد السيد والاستاذ محمد ابو عاصي باقتراض ما يقرب من 100 ألف جنية من حسابات ناس كبار في الخارج زي الحاج محمد نصر شعيب كانوا سايبين حسابات للأستاذ محمد أبو عاصي وذلك بعد الإستئذان والموافقة.

وقاموا بشراء المواد الخام كالقماش والصوف وغيرها من المال السابق وبدأ العمل وتم التسليم في الميعاد وقامت اللجان بوضع النقود( 3000 جنيه لكل لجنة) في حساب اللجنة ببنك ناصر.

فأصبح رصيد اللجنة 44 في 3000= 132000 جنية.

تم سحب مبلغ 70 ألف جنيه دفعة أولي لتسديد جزء من الديون المستحقة.

بعد ذلك تم سحب مبلغ 61 ألف جنية دفعة ثانية لسداد باقي ديون الناس وباقي المبلغ المسحوب لتشغيل المشغل من جديد لانه بعد تسليم الملابس للجان لم يعد به مواد خام .

في الصيف جاءت مبالغ تبرعات من فاعلي الخير في الخارج بما يعادل 150 ألف جنيه.

وكان قد تم بيع بضاعة من المشغل بمبلغ 20 ألف جنيه وأصبح المبلغ كاملا 170 ألف جنيه.

قامت اللجنة بشراء جرار بمبلغ 39 ألف جنيه وسيتم الحديث عنه لاحقا.

أصبح المتبقي من المبلغ 131 ألف جنية هو ما تم ايداعه وما ظهر في الوصل المقدم من قبل الباش مهندس العلام.

الباش مهندس قال:

واحد غلبان - وقال لي إسمة ومش هذكرة علشان التشهيروالتجريح وحرمة الميت - يعاني المرض وليس لديه المال . اللجنة أمدته بـ 100 جنيه وعلي لسان الباش مهندس آخر كشف للراجل قدام عينه بـ 105 جنيه غير الدواء غيرأي حاجة تانية وأي كشوفات أخرى .... ليه ما يدولوش ؟؟ ما يستحقش؟؟

واجهت اللجنة بالسؤال

رد اللجنة:

فتحوا لي كشف شهر واحد لعام 2008 مرضى ورأيت إسم واحد قريب للباش مهندس ضمن الناس وقالوا بنديله وهنفضل نديله وندي أي محتاج سواء قريبه أو مش قريبه وأنا أشهد لأني رأيت بعيني أن مبلغ كشف المرضي لكل شهر حوالي 1500 أو 2000 جنيه علي الأقل دا غير حساب الصيدلية واسألوا الأستاذ / طلعت شرف الدين بصيدلية الشرايفة.

ورأيت حساب شهور إتنين وتلاته وأربعة وخمسة الماضية. ورأيت ناس لهم روشتات بـ 200 جنيه وتم دفع المال لهم لأنهم يستحقوا يبقا يا باش مهندس مبلغ الـ 100 جنيه مش ثابت لأي مساعده لأ دولا بيدوا مرة واتنين وتلاته وشفت ده بعيني طالما الشخص يستحق.

وتكلمنا عن بعض الأشخاص اللي بيتبرعوا وقال مش كل الناس بياخدوا وصل الا اللي بيطلب زي الحاج شحته الخولي والحاج / عبد الحميد الزميتي..

واجهت الحاج محمد السيد خطاب وكان

رد اللجنة:

يا دكتور الحاج شحته ما دفعش حاجة وبناءً عليه ما خدش وصل.

أما الحاج/ إبراهيم الزميتي دفع والوصولات أهي... ورأيتهم بعيني يا باش مهندس يعني الناس ما أنكرتش. وأضافو قائلين:

وأي حد بيدفع بياخد وصل اومال الدفتر بتاع الوصولات ده ايه لزمته؟؟

أظن الكلام مقنع يا جماعة.

سؤال الباش مهندس إبراهيم:

الحاج محمد عبدالرحيم قال له علي لسان الحاج محمود شعبان رئيس اللجنة سابقاً:

في واحد بيدي اللجنة كل شهر 4000 جنيه بيروحوا فين؟؟

رد اللجنة:

بيدخلوا اللجنة وآدي الوصولات

ورأيت وصولات من شهور فاتت بعيني وطبعا دكتورخالد أمين، م/ كريم العشماوي

صوروا وصل منهم ورفعوه للمنتدي. وللعلم اسم الشركة اللي بتدي 4000 جنيه كل شهر للجنة شركة فاين بيك بالقاهرة وطبعاً لازم ياخدوا وصل علشان الضرائب زيهم زي الحاج / عبد الحميد الزميتي.

الباش مهندس قال:

علي لسان أ/ محمود العزب واحد من أفراد اللجنة له بنت ، وواحدتاني غلبان له بنت،

البنتين زملاء في سنة دراسية واحدة ، بنت الراجل الغلبان متفوقة دراسياً وكانت بتروح لبنت الراجل اللي هو مع اللجنة تذاكرلها أو معاها... المهم حصلت مشكلة بين البنتين عادي يعني زملاء وبتحصل بينهم مشاكل شيء وارد . لهذا السبب بنت الراجل الغلبان المتفوقة ما عادتش بتروح تذاكر مع بنت الراجل التاني اللي مع اللجنة.

يتسبب ذلك في إنهم يمنعوا حق الراجل الغلبان في مال الزكاة مع كونه يستحق إيه رأيهم؟؟؟

واجهت طبعاً اللجنة بالموضوع الخطير ده وكان

رد اللجنة:

احنا ما نعرفش أي حاجة عن الموضوع ده ، ومافيش حاجة كدا.

وكان تعليق اللجنة:

واضح ان معلوماته معظمها غلط أو مشوشة.

طبعا الباش مهندس قال لي الكلام دا علي لسان أ/ محمود العزب

وبالصدفة قابلت أ/ محمود العزب بعد العشاء يوم الجمعة وكان معايا د. خالد أمين ودي صورتنا احنا التلاتة

وطبعاً انتهزت الفرصة وسألته عن الموضوع وكان رده غريب وغير متوقع بالمرة يا باش مهندس الـ أ/ محمود أنكر معرفته بشيء عن الموضوع.

وطبعاً سألته طيب ايه رأيك في اللجنة رد بإجابة ممتازة قائلاً:

الناس دي محترمة ، وواجبنا اننا نساعدهم واللي يشوف نقد يواجههم وأي حد ينتقد بس في أسلوب للنقد أسلوب ناس متعلمين ومثقفين.

الباش مهندس قال:

قابلته علي الكوبري في دفنة في شهر 4 الماضي .

وقولتله : لازم نواجه اللجنة وانتا عارف ان فيها حاجات كتير غلط .

رد الأستاذ أحمد علي وقال لي- للباش مهندس يعني - :

أنا مش من اللجنة أنا واسطة خير وخلاص.

واجهت الأستاذ/ أحمد علي بكلام الباش مهندس وكان رده كالتالي:

لم ينكر إطلاقاً أنه قابل الباش مهندس في الدفنة ولكن قال أنا اللي ناديته وقولتله تعالى ولو في مشكلة نشوفها وتعالى نصفي الخلافات ونشوف فين الحق. رد الباش مهندس قال : لأ مش جاي معاك ووضح الأستاذ / أحمد علي إنه كان عايز يقعد علشان الباش مهندس خطب علي اللجنة وقال انهم حراميه فكان عايزيصفي الخلافات وإنه فعلا كان واسطة خير.

وقال كمان : انا فعلا مش عضو في اللجنة الرئيسية لأن اللجنة 9 أشخاص معروفين.

أنا عضو في الجمعية العمومية اللي من مهامها البحث عن ما إذا كانت اللجنة الرئيسية تؤدي وجهها علي أكمل وجه أم لا؟؟؟

الباش مهندس قال:

رجل - ولا داعي لذكر الإسم منعاً للتشهير - من عزبة بهي الدين وزوجته تعمل موظفة في مدرسة الأمــل للصم والبكم في سنفا يحتاجوا لمساعدة وتقوم اللجنة بمساعدتهم دوماً.

واحد من اللجنة لا يحتاج لمساعدة كشف عند دكتور فكتبله روشته فيها قطرة تمنها غالي حبتين .. وقام كتب الروشته بإسم الست دي وراح صرفها وطبعاً بمحض الصدفة زوج الست دي اكتشف الحكاية عند الأستاذ طلعت شرف الدين!!!!! وطبعاً الموضوع اتسكت عليه

ايه النظام؟؟؟؟

واجهت الحاج محمد السيد وكان

رد اللجنة:

حصل بس أنا إيه عرفني؟؟؟ واحد جاي يصرف بإسم غلبان أقوله لأ؟؟؟

قولتله طب وسكتوا؟؟ قال: طبعاً لأ قولتله طيب عملتوا ايه؟؟؟

قال لي : أخدنا منه الفلوس ثمن الروشتو ووبخناه والموضوع انتهى ولا نشنقه؟؟

وبعد كدا أخذوا قرار ان الدواء اللي يصرفه صاحب الروشته نفسه أو أقرب الأقربون له ومش أي حد تااااني. أظن كدا حل مثالي.ولا ايه؟؟؟

الباش مهندس قال : علي لسان الحاج محمود شعبان :

المرض اللي جالي ده عقاب من ربنا . في مرة جه للبلد بطاطين تبرع للغلابة . الشيح محمود الناس راحت له بالليل وخبطوا علي بابه وقالوا له عاوزين بطاطين .. راح الشيخ محمود للأستاذ محمد قاله لأ دي مش تبع لجنة الزكاة. يقول الشيخ محمود شعبان أفاجأ أثناء تسوية العهدة بعد تقديم الإستقالة بـ 14 ألف جنيه ثمن للبطاطين سأل الحاج محمد فقال له :

إمضي وخلاص اتوزعت علي مستحقيها ... إيه رأيهم؟؟؟

طبعاً واجهت اللجنة بالموضوع كالتالي:

يا حاج محمد ايه رأيك في الحاج محمود شعبان؟؟؟ رد قائلاً : راجل محترم وكان معانا في اللجنة قولتله تمام وحكيت له علي الموضوع وكان

رد اللجنة :

البطاطين جبناهم واتوزعوا علي مستحقيهم . واحد من مصر اتصل بيا قاللي انه متبرع بمبلغ لشراء 40 بطانية - المبلغ والأرقام هما قالوهم بس بصراحة أنا مش فاكرهم- وراحوا المحلة وأخدوا عربية وجابوا البطاطين واتوزعت ليلاً في الخفاء في وجودة نخبة من شباب البلد علي مستحقيها وعملية التوزيع خلصت في ساعة .

وأنكرت اللجنة وجود أية مبالغ سجلت في دفاترهم وحساباتم بإسم البطاطين في حساب اللجنة.

الباش مهندس قال:

راجل غلبان- وقال لي إسمه وطبعا لن أذكرة منعاً للتشهير - عنده جاموسة عايش من ايرادها . الجاموسة ماتت راح للجنة أعطته 100 جنيه ، قام الراجل رمي لهم الفلوس وقالهم مش عايز حاجة. في الوقت نفسه اللي واحد تاني - وقال برضو اسمه ولن أذكره منعاً للتشهير - أمدته اللجنة بالأسمنت اللازم لبناء دورين من منزله لأنه عارف عنهم حاجات كتير فبيسكتوه . دا يرضي ربنا؟؟؟

واجهت طبعاً اللجنة والحاج محمد السيد وكان الرد مقنع وواضح كالتالي:

رد اللجنة:

الراجل صاحب الجاموسة أعطوه 1000 جنيه أول مرة لما جاموسته ماتت ، أظن ألف جنيه من اللجنة لفرد واحد مبلغ معقول وكويس يا باش مهندس. ولا إيه؟؟؟

وبعد ذلك جاموسته الجديدة كانت هتموت لكن لحقوها وذبحوها وتعاطف معه الجزارين وباعوا لحمها وأعطوه الإيراد . واللجنة مشكورة أعطته 400 جنيه للمرة الثانية ، غير الإيراد اللي أخذه من بيع اللحم ليستطيع أن يشتري جاموسة جديدة. يعني الكلام واضح ومش 100 جنيه بس يا باش مهندس أظن كدا معقول ولا إيه؟؟

*********************************************************

أما حكاية الأسمنت :

بالنسبه لإتهام الباش مهندس

أولا: رصيد اللجنة لا يسمح بتزويد أحد بالأسمنت لبناء دورين وحضرتك معندس مدني وعارف طن الأسمنت بكااااام اليومين دول.

ثانياُ: اللجنة متفقين ان أي حد فقير منزله وقع أو بيبني ومحتاج فلوس تعطيه اللجنه طن أسمنت أو اتنين بالكتير أو مقطورة أو اتنين طوب وماحدش أخد أكتر من كده. ومحدش ماسك عليهم ذلة لأنهم مراعيين وجه الله في عملهم. أظن يا جماعة الكلام واضح. ولا ايه ؟؟؟

قلت أسأل عليها بالمرة وأهو موضوع واتفتح ولازم نشوف كل الجوانب:

الأوتوبيس كبير معقول كل دا ما بيجيبش إيراد ؟؟؟

وجهت سؤالي طبعاً للأستاذ/ محمد غيث لأنه هو المسئول عن الأوتوبيس كالتالي:

يا أستاذ/ محمد الأوتوبيس معروف عنه انه إسمه إيه في البلد ؟؟؟ قال عَبّارة

قلت له تماااام عبارة يعني بتاخد ناس كتير قال آه أكتر من ستين . قولت له طيب معقول انه ما بتجيبش ايراد خالص؟؟ قال لأ طبعاً تعالي أوريلك الحسابات في ملف مشروع نقل الركاب:

الأوتوبيس إيراده اليومي مش أقل من 200 جنيه وساعات 250 وحسب تساهيل ربنا

يعني في الشهر من 6 الي 8 آلاف جنية ده أجرة الناس. تعالي بقا نشوف بالأيام:

الأوتوبيس له حساب شهر بشهروورقه فيها الإيرادات وورقه فيها المصروفات أقوم أنا بطرح المصاريف من الإيرادات يطلع المكسب ويتم نقله للشهر اللي بعده.

ورأيت بعيني الشهور فمثلا شهر 4 السابق رصيد الأوتوبيس 880 جنيه اتضافوا للشهرالتالي اللي هو شهر 5 تعالوا نشوف جُم منين؟؟؟

لو رجعنا للخلف كان رصيده من الشهور السابقة 2400 جنيه علي آخر الشهر أصبح الإيراد 8505 جنيه والمصروفات 7625 جنيه يعني يعتبر صرف الإيراد كله وما فضلش غير 880 جنيه لأن تم تغيير موتور .

الـ 880 جنيه علي آخر شهر 5 أصبحوا 6200 جنيه وصرف 5400 جنية

بطرح المصاريف من الإيراد يبقا الباقي ( العائد) = 800 جنيه .

طبعاً زيي زي أي حد في البلد مستغرب من المصاريف دي لازم أسأل :

كل دي يا أستاذ/ محمد مصاريف ؟؟!!؟؟ رد قائلاً تعالي نشوف :

مثلاً غيروا تيل فرامل بـ 461 جنيه والأوتوبيس واقف يوم علشان يتغير .

مثلاً تغيير قواعد الموتور بـ 289 جنيه

الأوتوبيس بتاعنا نوعه غريب مش زي الـ هاشم باص كل ما يحصل حاجة للموتور ما يلاقوش قطع غيار هنا و يقعدوا يلفوا عليها في مصر واسكندرية . قاموا بتغيير قواعد الموتور علشان يبقا زي الـ هاشم باص ويلاقوله هنا قطع غيار بسهولة. اتكلفت القواعد 289 جنيه .

مثلا تغيير سوست بـ 770 جنيه سعر السوسته من 80 - 90 جنيه دا غير التركيب ومصاريف سيارة علشان يجيبوا السوست من السنبلاوين ... إلخ وكل شيء مكتوب.

تعالي نشوف أيام:

يوم 6 في شهر 5 الماضي :

ايراد الأوتوبيس 216 جنيه تقريباً

والمصاريف 81 جنيه وهي مصاريف جاز وأكل وكارته ومرور.

يوم 11 في شهر 5 الماضي :

ايراد الأوتوبيس 230.25 جنيه

والمصاريف 101 جنيه وهي مصاريف جاز وأكل وكارتو ولحام .

تيجي خبطة كبيرة أو حاجة تبوظ تخلص علي الرصيد الموجود أظن مفهوم؟؟

يا جماعة الكلام دا أنا شفته بعنيا من الكشوفات واللجنة فوق كدا عاملة عرض للباش مهندس وأي حد بيشك في نزاهة عملهم :

عايز تاخد الأوتوبيس أسبوع ولا حتي شهر وتجرب وتشوف هيعمل ايه أهلا بيك واحنا موافقين. أظن كدا عداهم العيب. وحقهم انهم ما يتهاجموش.

الباش مهندس قال:

الجرار لا يساوي أكتر من 20 ألف جنيه شاريينه هما بـ 39 ألف جنيه ليه؟؟ مش حرام؟؟

رد اللجنة:

هات لنا 3 بنفس حالته وهنديلك 60 ألف . دا غير إنهم قالوا بأن في تاجر- قالولي علي إسمه بس أنا نسيته - عرض عليهم شراؤه بمبلغ 44 ألف جنيه يعني أهو كسبانين فيه.

سؤال مشهور من كل أهالي البلد وأنا من ضمنهم : فين ايرادات الكساحة؟؟؟

رد اللجنة:

عبادة - واحد إسمه كدا - ماسكها بقاله 4 شهور روحوا وإسألوه معاه قد إيه ؟؟ يعني إستفاد منها بمبالغ زي ما انتم متصورين ولا ايه؟؟

وكمان عندكم الأستاذ/ أحمد أبو عاصي مدرس اللغة الإنجليزية

أخدها يوم كره الدنيا كلها وقال لنا لأ هنيالكم والحق عليا لكم.

الباش مهندس قال:

اللجنة أمرت الشيوخ في المساجد بتاعة البلد أن يحاربوه ويمنعوه من الخطابة ايه رأيهم؟؟

رد اللجنة :

أنكروا تماماً هذا العمل وقالوا إن الخطباء أحرار واللجنة مالهاش سلطة عليهم

بل علي العكس

الحاج محمد يقول لك يا باش مهندس : مين راح معاك هنا وهناك وشجعك علي الخطابة في بدايات ما بدأت تخطب؟؟ مين راح معاك سرنجا والعزب وغيرها وشجعك علي الخطابة.

إذاً سيادتك اللي حاربتهم وبتحاربهم مش هما اللي حاربوك.

الباش مهندس قال في أول حواري معاه:

أنا مستعد أتواجه بأي كلام قولته :

رد اللجنة بعد ما خلصوا الدفاع عن أنفسهم وأظن دفاع مقنع يا باش مهندس:

هذا هو آخر كلام في الموضوع ولن تقوم اللجنة بالرد علي أية مهاجمات أخري لمشغولياتها وأي شخص أياً كــان يرغب في الإستفسار عن أي شيء بيت الحاج/ محمد السيد مفتوح في أي وقت 24 ساعة - ربنا يجعله عامر يا حاج محمد - لكن بدون مهاجماااااااااااااااات.

والناس بتتقبل النقد البناء.

أتمني تكون الحقيقة وضحت للناس وللباش مهندس/ إبراهيم

ولي ملحوظة بقولها لعاااااااااااشر مرة : الباش مهندس/ إبراهيم مش معني انه هاجم اللجنة يبق شخص وحش

لأ طبعا كل الناس عارفين انه شخصية محترمة وأنا أولهم بس دايماً في أمور بتوصل غلط للناس. أتمني أكون وفقت في عرض نتائج مواجهة الطرفين.

اللّهم اني وهبت هذا الجهد لك خالصاً

ادعولي بالتوفيق ولوالدي بالرحمة والمغفرة

وادعوا لجميع من ساهم معي بالتوفيق

دمتم سالمين،