السلام عليكم ورحمه الله وبركاته
الله أكبر الله أكبر الله أكبر لا إله إلا الله
الله أكبر الله أكبر الله أكبر ولله الحمد
خلاص
من دقايق ادن آخر مغرب في رمضان 1429
صحيح كلنا مبسوطين بالفطر وبرضه بندعو ربنا انه يكون تقبل منا رمضان وإنه يعيده علينا أعواما وأعواما في طاعه الله
لكن في نفس الوقت كان فيه حاجه تانيه بتحصل وإحنا مش شايفينها
مع الآذان وتكبيراتنا بعد الصلاه كانت الشياطين بتتفك أصفادها وبتنزل تاني للأرض
خلي بالك
إنتا في رمضان كنت بتجاهد نفسك بس
دلوقتي شيطانك رجعلك
الحرب بدأت مره تانيه
الشيطان زعلان ومقهور على الأيام اللي قضيناها في طاعه الله
ها، هنفرحه فينا ونسيبه يعوض الأيام دي بذنوب ومعاصي جديده
ولا هنتحداه ونستعيذ بالله منه ونقسم بعزه الله إننا هنعمل قدر جهدنا إنه مش هيقرب مننا
كل واحد فينا يشوف صام عن إيه في رمضان غير الأكل
ياللي صمت عن الأغاني، هترجعلها تاني؟
ياللي صمتي عن الأفلام والمسلسلات، هتقضي يومك تاني قدامها؟
ياللي صمت عن غض البصر، هرحع تطلق عيونك فيما حرم الله عليك؟
ياللي صمتي عن اللبس اللي ميرضيش ربنا، هترجعي تاني تفرجي خلق الله على جسمك؟
كل واحد يسأل نفسه نفس السؤال
أنا بطلت إيه علشان رمضان؟
وبعده عليطول يسأل نفسه، هرجع تاني ولا هثبت؟؟
أنا عن نفسي بقول اللهم إني لازلت صائم
اللهم إني لازلت صائم عن كل ذنب ومعصيه، عن كل قكر وقول وعمل لا ترضاه سبحانك سواء كان في السر أو العلن
وأدعوك سبحانك أن تثبتني وتقدر لي من خشيتك ما يباعد بيني وبين معصيتك
اللهم آمين
ها، حد نواها معايا؟
بالله عليكو، إذا كنا حرمنا لذه الصيام فبلاش نحرم من لذه الطاعه
تعالوا نفضل صايمين عن كل ما يغضب الله سبحانه وتعالى
إحنا النهارده ليله العيد
كل واحد بقه يجي يقوللي كان ناوي يعمل إيه
كنت ناوي تنزل مع أصحابك تقعد على كوفي شوب وتتفرج على البنات؟
وإنتي كنتي ناويه تنزلي تفرجي نفس الولد اللي قاعد على نفس الكوفي شوب على لبس العيد الجديد؟
ولا ناويين نعمل زي ما الرسول وصحابته كانوا بيعملوا
كانوا بيطلعوا زكاه الفطر وكانوا بيقضوا الليل كله في تكبير وحمد لله ودعاء بأن يتقبل منهم رمضان
عايز تنزل وانتي عايزه تنزلي
انزلوا
بس انزلوا علشان تهتدوا بهدي الرسول وصحابته وتوزعوا زكاه الفطر على الفقراء والمساكين
هتقوللي انا طلعتها خلاص
يبقى تقول ورايا
اللهم تقبل منا رمضان، اللهم تقبل منا صيامنا وقيامنا، اللهم ثبتنا بعد رمضان، اللهم لا تكلنا إلى أنفسنا طرفه عين، اللهم إنا نعوذ بك من همزات الشياطين ونعوذ بك ربنا أن يحضرون، اللهم اجعل القران ربيع قلوبنا ونور صدورنا وجلاء حزننا وذهاب همنا وغمنا يارب العالمين، اللهم لا تكلنا إلى أنفسنا طرفه عين وأمتنا ونحن صائمين عن كل ما لا ترضى واغفر لنا واهدنا وارحمنا إنك على ما تشاء قدير
اللهم صلي على محمد وعلى آل محمد كما صليت على آل ابراهيم وبارك على محمد وعلى آل محمد كما باركت على ابراهيم وعلى آل ابراهيم إنك حميد مجيد
واقضي هذه الليله في تكبير وحمد
الله أكبر الله أكبر الله أكبر، لا إله إلا الله
الله أكبر الله أكبر الله أكبر، ولله الحمد
أنا آسفة يا شباب على الإطاله دي كلها
ولكن هذا امتثالا لقول الله تعالى: وذكر فإن الذكرى تنفع المؤمنين
بس في النهايه أوصيكم بركعتي الضحى والقيام يوميا
وأذكار الصباح والمساء
والصلاه في المسجد وسنن الفروض
وربع ساعه بس على الأقل ورد يومي من القرآن الكريم
متقطعوش عن القران بعد رمضان يا شباب
والله ما هياخدوا غير ساعه زياده
بس قدام الساعه الزياده دي جبال وجبال من الحسنات
وهقولها تاني
اللهم إني مازلت صائم
آسفة على الإطاله
السلام عليكم ورحمه الله وبركاته
موضوع: اللهم اني مازلت صائم 
الثلاثاء سبتمبر 30, 2008 11:23 pm
شكرا على الموضوع الجميل دة 
