كرسى الاعتراف

قررت ان يكون ضيف كرسى الاعتراف

هو

PIONEER

كريم حماد

انا بجد بتعجبنى ردودك بالذات عن المراه عشان كده نفسى اسال:-

الحب ايه من وجهة نظرك؟
دة طبعا غير حب ماما وبابا والوطن (الكلام القديم ده)

الخيانة ايه من وجهة نظرك؟

ايه اكتر حاجه توجعك؟

ايه سر انك تناصر المراه؟
وما هى مواصفات فتاه احلامك؟

الردود بتاعتك دى انت مؤمن بيها ولا ده بس عشان تلفت الانتباه؟ بس من غير زعل

حبيت كام مره؟

ايه هدفك فى الحياة؟

نفسك تشتغل فين لما تخلص؟

وعايز تقبض كام لما تشتغل؟

ايه رايك فى اوباما؟

مين اكتر حد بتحبه فى الدنيا؟ بصفه عامه ولو عايز تقول بصفة خاصه ممكن

كفايه كدة عليك بس ياريت تجاوب بصراحة ده لو جاوبت اصلا
سلام

أسئلة شديدة من انسان انا بتوقع انى عارفه كويس قوى

الحب ايه من وجهة نظرك؟
دة طبعا غير حب ماما وبابا والوطن (الكلام القديم ده)

والله حب ماما وبابا مش كلام قديم ولا حاجه

بس الحب اللى انت عايزه
يبقى أسمى شئ فى الوجود

الخيانة ايه من وجهة نظرك؟

الخيانة طبعا هى أقذر شئ فى الوجود لو كانت من انسان انت تقتنع انه يحبك وانت تحبه

ايه اكتر حاجه توجعك؟

اكتر حاجه توجعنى انى أدى الحب لانسان وملاقيش .................

ايه سر انك تناصر المراه؟

والله هوة مش سر ولا حاجه انا عمرى ماعرفت أكره بس أعرف احب
عايزنى أقول ان سر تناصرى للمرأة انى انا بحب ............. برده مش هقول

وما هى مواصفات فتاه احلامك؟

انها تكون بتحبنى قوى زى منا كمان بحبها
انها تكون مؤدبة قوى زى منا كمان عمرى ماهفكر انى أخونها
انها تكون جميلة
انها تكون بتتمتع بشخصية قوية جدا لمواجهة الصعب

انها تكون بتعرف تعمل مكرونة

الردود بتاعتك دى انت مؤمن بيها ولا ده بس عشان تلفت الانتباه؟ بس من غير زعل

عمرى ما كتبت رد وانا مش مؤمن بيه
عمرى ماعملت حاجه وندمت انى انا عملتها
عمرى ما حبيت شخص وندمت انى انا حبيته
عمرى ما حبيت اكون ماشى فى الشارع والناس تبص عليا ( مبحبش ألفت انتباه الناس ليا)

حبيت كام مره؟

حبيت كتييييييييييييييييييييييير انا اصلا معرف أعمل حاجه غير انى أحب

بس الحب اللى انت تقصده
وانا صغير حبيت مرة وانا عندى 5 سنين بنت زى القمر والله ما اعرف هية راحت فين دلوقتى مشوفتهاش من وانا عندى 6 سنين

وانا كبير حبيت مرتين

ايه هدفك فى الحياة؟

هدفى فى الحياة انى أعيش مرتاح ومبسوط نفسيا ( انى معملش حاجه تغضب ربنا طبعا)
وانى اكون سبب فى سعادة كل من حولى

نفسك تشتغل فين لما تخلص؟

نفسى أشتغل فى السعودية وده مش علشان حبى فى السعودية
ده علشان نفسى أحج

وعايز تقبض كام لما تشتغل؟

كل واحد عايز يقبض اول مرتب ليه مليون جنية

بس انا مش طماع قوى كده انا عايز بس 100 الف جنية اول مرتب

والله انا عايز انى أعيش مرتاح ومكفى بيتى وأهلى وأعيش فى وسائل الراحه والترفيه
مفكرتش أقبض كام

ايه رايك فى اوباما؟

رأيى فى أوباما زى رأى اى واحد مصرى بيحب الديمقراطية ويحب يعيش حر فى بلده

مين اكتر حد بتحبه فى الدنيا؟ بصفه عامه ولو عايز تقول بصفة خاصه ممكن

اكتر حد بحبه فى الدنيا هوة أبويا وامى

اما بصفه خاصه زوجتى اللى انا هتجوزها انشاء الله

والله كل الاجابات دى كانت بصراحه

والحمد لله جاوبت وخيبت ظنك فيا

لا شغال وردودك هايله

بس ليه متاكد انك تعرفنى

انت متعرفنيش لانى مش من البلد

هو محدش هيسالك تانى ولا اية

مسموح لى اكمل اسئله ولا انا تقلت عليك

لا عادى مسموح لحد يوم الجمعه الجاى اى حد يسألنى وبعدين انا اللى هرشح بعد كده أسال مين

وبعدين مين قال انى متأكد انى أعرفه

انا قولت بتوقع انى أعرفه كويس قوى

طيب عادى ولوتعرفنى عادى

فيه كمان شوية اسئلة

عمرك خدعت حد؟

ايه اكتر يوم بتكرهه فى حياتك؟

ايه ايه احسن يوم فى حياتك؟

كفايه كده عليك واقفل وروح ذاكر

ايه ياعم انت مالك مصدينى ليه كده

وبعدين أذاكر براحتى

هجاوب على الاسئلة بتاعتك بردو

عمرك خدعت حد؟

مفتكرش انى انا خدعت حد قبل كده بيتهيألى كده انا اللى بتخدع من الناس

ايه اكتر يوم بتكرهه فى حياتك؟

انا عمرى ما كرهت
انت ممكن تقول ايه أكتر يوم انت مبتحبوش ولا تحب تفتكره
هوة يوم ما مات واحد عزيز عليا

ايه ايه احسن يوم فى حياتك؟

أحسن يوم فى حياتى يوم ما ربنا أدانى اللى انا عايزه واللى بحلم بيه

اسئل كمان معاك لحد الصبح

ماهو يانا ياانت

مش عارف اسال ايه بس ممكن نقول

تعرف عيوبك؟وايه هى؟

انت فى البلد؟

تعرف عيوبك؟وايه هى؟

أعرف عيوبى كويس قوى
ايه هيا ..................................أفضل أحتفظ بيها لنفسى

انت فى البلد؟

لا مش فى البلد

ما سر اختيارك لهذا الاسم ؟

هل انت حبيب يعنى ممكن نقول مقطع السمكه و ديلها ؟

ما هو اعز صديق لك ؟

ما مفهومك عن:

الحياه

الام

الحب

المراه

الدنيا

انت فى كليه ايه ؟ قسم ايه؟

لما تتخرج هتشتغل فى مصر-وال هتسافر بره ؟
انطباعك عن

مصر
لجنه الزكاه
عنى (الاستاذ)

هل انت عرفنى ؟

هل حدث و تغيرت نظرتك للحياه -ام ان نظرتك لم تتغير منذ نعومه اظفارك؟

لسه بتشجع الزمالك؟

العضو واحد من الناس فين ؟

و الجوهرى فين ؟

يا ترى تعرف سبب فتور المنتدى الحالى بعد قوة البدايه ؟

انطباعك عن الاعضاء :

المدير

انجنير فيف ستار

خالد امين

نائب الجماعه

افريكانو

بيبى جيرل

سيجنل هارت

هل حبيت بجد ؟

و لسه بتحب وال غيرت رايك ؟

اسالك انت راضى عن احوال الناس و عن مصر ؟

و لو مش راضى لسه عايش فيها ليه ؟

وهل لو جات لك فرصه للسفر للخارج هتسافر و ال لا؟

و لو هتسافر -هتسافر ليه ؟
و للحديث بقيه

ما سر اختيارك لهذا الاسم ؟]

سر اختيارى للاسم انى انا زمان كنت بحب العب gamesوكانت كلمة pioneer دى شفرة لألعاب كتير كنت بلعبها
فحبتها ............. لما اتزنق اقوم كاتبها.

هل انت حبيب يعنى ممكن نقول مقطع السمكه و ديلها ؟

لا حبيب ولا حاجه ياعم ولا أعرف حتى السمكة ولا ديلها

ما هو اعز صديق لك ؟

والله هوة مش واحد دول كتير منهم أحمد ابو عسل ومحمد حازم ........................ وكتير

ما مفهومك عن:

الحياه : لازم نعيشها

الام : حنية الدنيا

الحب : وسيلة للوصول الى السعاده

المراه : نصف المجتمع

الدنيا : بدايتها براءة ونصفها شجاعه ونهايتها ضعف

انت فى كليه ايه ؟ قسم ايه؟

جامعة الازهر-كلية الهندسة - قسم الهندسة المدنية - الفرقة الرابعه

لما تتخرج هتشتغل فى مصر-وال هتسافر بره ؟

والله مش بمزاجى .

انطباعك عن

مصر : ابويا وامى واخواتى وعمى وخالى واصحابى وحبايبى

لجنه الزكاه: ناس محترمة وأتمنى انى اكون منهم

عنى (الاستاذ): مشوفتش منك حاجه وحشه

هل انت عرفنى ؟

لا......... يحصلى الشرف بمعرفتك

هل حدث و تغيرت نظرتك للحياه -ام ان نظرتك لم تتغير منذ نعومه اظفارك؟

أه اكيد طبعا نظرتى بتتغير للحياة وكل يوم بتعلم من الدنيا

لسه بتشجع الزمالك؟

أه طبعا. وهفضل أشجعه مش علشان انا بكره الاهلى لا
علشان انا بحب الزمالك من وانا صغير.

العضو واحد من الناس فين ؟

معنديش فكرة . بس أكيد مش فاضى

و الجوهرى فين ؟

لسه مخلص أمتحانات قريب

يا ترى تعرف سبب فتور المنتدى الحالى بعد قوة البدايه ؟

حاجات كتير زى الاعضاء المهمين مش فاضيين وزى عدم أهمية المواضيع المطروحه

انطباعك عن الاعضاء :

المدير: صاحبى وحبيبى

انجنير فيف ستار : حبيبى بردو انا أصلا بدخل المنتدى علشانه

خالد امين : هنا بقى لازم أضحك
خالد يبقى صاحبى من واحنا فى اولى حضانه وكنا لسع مع بعض امبارح مع اننا مش فاضيين

نائب الجماعه : سعد زميل قديم-- ورجولة

افريكانو: راجل كويس ابن بلد .......... هوة فين

بيبى جيرل : من القلة الموجودين فى الدنيا هذه الايام ( بنت محترمة تتمتع بعقلية يجب احترامها)

سيجنل هارت : عضو جديد أتمنى ان يتواصل معنا

هل حبيت بجد ؟

ايوة

و لسه بتحب وال غيرت رايك ؟

انا على فكرة صعي انى أغير رأيى فى موضوع زى ده بالذات

اسالك انت راضى عن احوال الناس و عن مصر ؟

لا طبعا

و لو مش راضى لسه عايش فيها ليه ؟

والله قدرى انى أعيش فيها . ومش معنى كده لو لقيت حتة تانية أعيش فيه هروح أعيش فيها
عايش فيها علشان دى بلدى ال فيها كل الناس اللى بحبهم

وهل لو جات لك فرصه للسفر للخارج هتسافر و ال لا؟

والله لو فرصة حلوة هسافر زى أى واحد مصرى نفسه يعمل لنفسه مستقبل كويس

و لو هتسافر -هتسافر ليه ؟

بيتهيألى جاوبت عليه فى السؤال اللى قبله

يا سلام يا بيوووووووووووووووووو

ايه العقل ده

مش بقولك الدنيا بيس و حلوة معاك

مش عارف التقائل ده هيسيبك امتى
و تبدء تبص للدنيا من منظور اخر

على فكره انا الى الان الدنيا بيس معايا الى حد ما
او مش كل الاوقات

أبصلها منين يعنى ياانجنير

خليها ايزو مترك أحسن

مش هتسئل ولا ايه ياانجنير .
يلا خد حقك انت كمان علشان اللى هيقع بعد كده تحت ايدى مش هرحمه؟

نبدء الاسئله:

1-محتويات بطاقتك
الشخصيه؟

2-هواياتك ؟

3- اكلتك المفضله؟

4-فريقك الاوروبي
المفضل ؟

5-ما استيلك فى اللبس ؟

6-مثلك الاعلى ؟

7-احب ماده فى الكليه
الى قلبك ؟

8- من هو سبب ازمه نادى
الزمالك ؟

9- من اصلح شخص لرئاسه
نادى الزمالك ؟

10- لحد امتى هتشجع
الزمالك ؟

11- انت شايف انك موهوب
فى لعب الكوره؟

12-ما هى طموحاتك ؟

13- دخلت مدنى بمزاجك ؟

14- هل كانت طموحك انك
تدرس الهندسه ؟

15- اصعب موقف مر عليك
؟

16- اظرف موقف مر عليك
؟

17- بتشوف جو مصر احسن
و ال جو البلد ؟

18-هل انت مرتبط دلوقت
؟

و لو مرتبط

19- بتشوف انك ممكن
تتجوز ال انت مرتبط بيها ؟

20- ما هو مقياسك للحكم
على الناس ؟

21- مقاس جزمتك ؟

22- ما هى القناه
الفضائيه المفضله لديك ؟

23- بتعمل ايه فى وقت
فراغك ؟

24- عدد اصدقائك
القربين الى قلبك ؟

25- لك صحاب بنات ؟

26- حاجه مش عجباك
ونفسك تغيرها ؟

27- بتشوف انا العمل فى
مصر افضل –بعد التخرج – وال العمل فى الخارج ؟

28- ما هو مشروع التخرج
بتاعك ؟

29- هل انت مدمن شات ؟

30- معلق حريم على
الشات؟

31- اوصف علاقتك بالنت
و الكمبيوتر ؟

32- رائيك فى حال البلد
؟

33- بتقرء كتب خارج
الدراسه ؟

34- احب كتاب قراته ؟

35- جرنالك المفضل ؟

36 – احب فيلم الى قلبك
؟

37- رائيك ايه فى ال بيحصل للمصريين بره ؟

38- متابع احوال مصر ؟

39- لو شغلت التليقزيون
فايهما تتابع :

ماتش

برنامج حوارى

مسلسل

فيلم

فيلم وثائقى

40- شايف ان حياتك سهله
و عادى – و ال عندك مشاكل ؟

41- الى اى مدى انت مثقف ؟

42- لو فتح باب
للمناقشه – فاى موضوع تختار ؟

43- بيت شعر محبب الى
قلبك ؟

44- لو اعطيتك ورقه
وقلم تكتب بيهم ايه ؟

و نكمل
غداااااااااااااااااااااااااااااااااااااااااااااااااا

1-محتويات بطاقتك
الشخصيه؟

الاسم : كريم محمد حماد العشماوى
الجنسية مصرى
سنفا ميت غمر دقهلية
تاريخ الميلاد 8/2/1986
أعزب - مسلم

طالب بكلية الهندسة جامعة الازهر

2-هواياتك ؟

لعب فيفا - وقراءة شوية كتب

3- اكلتك المفضله؟

جلاش باللحمه المفرومة

4-فريقك الاوروبي
المفضل ؟

مانشتر يونايتد

5-ما استيلك فى اللبس ؟

ساعات كلاسيك وساعات كاجوال

6-مثلك الاعلى ؟

الاول الرسول صلى الله عليه وسلم
التانى أبويا

7-احب ماده فى الكليه
الى قلبك ؟

السنة دى
ادارة مشروعات

8- من هو سبب ازمه نادى
الزمالك ؟

سوء النظام فى الادارة

9- من اصلح شخص لرئاسه
نادى الزمالك ؟

انا

10- لحد امتى هتشجع
الزمالك ؟

لحد ما اموت

11- انت شايف انك موهوب
فى لعب الكوره؟

مش قوى

12-ما هى طموحاتك ؟

انى أبقى انسان ناجح فى عملى وانى أعمل حاجه تؤثر فى المجتمع بايجابية

13- دخلت مدنى بمزاجك ؟

لا

14- هل كانت طموحك انك
تدرس الهندسه ؟

لا

15- اصعب موقف مر عليك؟

يوم ما شوفت بنت صغير بتذاكر وبتبيع مناديل فى وسط شارع طلعت حرب

16- اظرف موقف مر عليك؟

مش فاكر دلوقت لما أفتكر هقولك

17- بتشوف جو مصر احسن
و ال جو البلد ؟

طبعا جو البلد

18-هل انت مرتبط دلوقت؟

لا ............................ مش معنى انى بحب أبقى مرتبط

و لو مرتبط

19- بتشوف انك ممكن
تتجوز ال انت مرتبط بيها ؟

.ايه المشكلة ايوة هتجوزها..

20- ما هو مقياسك للحكم
على الناس ؟

حاجات كتير زى طريقة كلامه - طريقة تعامله

21- مقاس جزمتك ؟

44

22- ما هى القناه
الفضائيه المفضله لديك ؟

الجزيرة

23- بتعمل ايه فى وقت
فراغك ؟

بلعب فيفا

24- عدد اصدقائك
القربين الى قلبك ؟

4

25- لك صحاب بنات ؟

لا

26- حاجه مش عجباك
ونفسك تغيرها ؟

اليفتة اللى على الكشك اللى قدام العمارة اللى انا ساكن فيها

مكتوب عليها الاهلى فوق الجميع

27- بتشوف انا العمل فى
مصر افضل –بعد التخرج – وال العمل فى الخارج ؟

انا بشوف العمل بمصر ولو سنة الاول أفضل من السفرللخارج

28- ما هو مشروع التخرج
بتاعك ؟

طرق أو صحية لسة مقررتش

29- هل انت مدمن شات ؟

لا

30- معلق حريم على
الشات؟

لا

31- اوصف علاقتك بالنت
و الكمبيوتر ؟

منتدى - وادور على كتب فى الدراسة وأبحاث وكلام من ده

32- رائيك فى حال البلد؟

لا يسر عدو ولا حبيب

33- بتقرء كتب خارج
الدراسه ؟

مش كتير

34- احب كتاب قراته ؟

شخصيات صنعت تاريخ

35- جرنالك المفضل ؟

الدستور

36 – احب فيلم الى قلبك؟

انت عمرى

37- رائيك ايه فى ال بيحصل للمصريين بره ؟

حسبى الله ونعم الوكيل وأرجع واقول احنا اللى عملنا فى نفسنا كده

38- متابع احوال مصر ؟

ايوة

39- لو شغلت التليقزيون
فايهما تتابع :

ماتش : لو مهم

برنامج حوارى : لو مفيش ماتش مهم

مسلسل : مبحبهمش خالص

فيلم : لو فيلم مشوفتوش ومفيش ماتش مهم ومفيش برناج شغال حلو

فيلم وثائقى : مبتفرجش عليهم

40- شايف ان حياتك سهله
و عادى – و ال عندك مشاكل ؟

مفيش حد معندوش مشاكل

بس الحمد لله بقدر أحل مشاكلى

41- الى اى مدى انت مثقف ؟

مدى متوسط

42- لو فتح باب
للمناقشه – فاى موضوع تختار ؟

كورة

43- بيت شعر محبب الى
قلبك ؟

فاز باللذه كل مجازف
ومات بالحسرة من يدرى العواقب

44- لو اعطيتك ورقه
وقلم تكتب بيهم ايه؟

بحبك

وبعدين هوة انت لسه عايز تكمل !!!!!!!!!!!!!!!!

مش كفاية دول ولا ايه

و نستكمل
....................................

45- هتتجوز من سنفا ؟

46- هتتجوز على سن كام
؟

47- كان نفسك تدرس ايه
غير هندسه ؟

48- التعليم العام افضل
– ام الازهرى ؟

49- بما انك قارئى
للدستور

رائيك فى ابراهيم عيسى
؟

محمد منصور ؟

بلال فضل؟

50- هل كنت مفيد لاصدقائك
؛ ام هم استفادوا منك اكثر؟

51- علاقتك بالمحشى .
ايه اخبارها ؟

52- البرنامج اليومى
بتاعك ؟

53-اكتر عضو خنقك فى
المنتدى ؟

54- تعمل ايه لو كسبت
مليون دولار ؟

55-تعمل ايه لو انت
وزير الماليه ؟

56- تعمل ايه لو انت
عضو مجلس شعب ؟

57- ماركه السياره ال
نفسك تركبها ؟

58- احب الاسم لولد و
بنت الى قلبك ؟

59- متى تتعصب؟

60- متى تفعل عند
اختلافك مع احد ؟

61- هل انت سهل
الاقناع؟

62- هل انت مشترك فى
منتديات اخرى ؟

63- هل انت جرى فى
الطبيعه ظ

64- ممكن تقول لنا بعض
صفاتك الحلوه – و الوحشه بالمره ؟

65- هل اصبت بالاحباط ؟
و لماذا ؟

66- مذياعك المفضل ؟

67- لاعب الكوره المفضل
؟

68 – شخصيه سنفاويه
تحبها و تحترمها ؟

69- افضل لاعب فى سنفا
؟

70- اوفى صديق لك – و
لماذا ؟

71- هل صدمت فى احد قبل
ذلك ؟

72- هل لديك اى
موهبه – و فى اي مجال ؟

73- بتحب شغل مدنى – و ال
مش فرقه كتير ؟

74- اخبارك مع الرسم فى الكليه؟

75- التيرم ال انت فيه
دلو قت تقيل و ال كويس ؟

76- عملت ايه فى المد
تيرم ؟

77- افضل مرجحله دراسيه
مرتك عليك ؟

78- ماهو المهم و ما هو المهم لديك ؟

79- مع المصباح السحرى
لك تلات امنيات ماهى ؟

80- شكلك مدمن العاب على الكمبيوتر ؟

81- شى تحس بالراحه
النفسيه عندما تنظر اليه ؟

82- مكان تحن اليه ؟

83- مدينه او بلد تود
زيارتها ؟

84- انسان مستعد تضحى
بحياتك علشانه ؟

85- احب شخصيه الى قلبك
؟

86- حد نفسك تعزمه – او
يعزمه ؟

87- لونك المفضل ؟

88- اخر مره ضربت فيها حد ؟

يا بيوووووووو انا بسالك اسئله سهله خالص ...............

و للحديث بقيه

- هتتجوز من سنفا ؟

انشاء الله

46- هتتجوز على سن كام؟

هخطب على سن 24 وأتجوز على 25

47- كان نفسك تدرس ايه
غير هندسه ؟

تربية رياضية

48- التعليم العام افضل
– ام الازهرى ؟

بالمقارنة الكلية التعليم العام أفضل

49- بما انك قارئى
للدستور
رائيك فى ابراهيم عيسى؟

راجل انا بحبه وبحب مقالاته وفكرت انى أعمل موضوع وأكتب فيه مقالات ابراهيم عيسى اليومية........... قريبا انشاء الله.

محمد منصور ؟

والله ساعات بحس انه متحيز لرأية قوى واللى يخالفه يبقى وحش

بلال فضل؟

حبيبى

50- هل كنت مفيد لاصدقائك
؛ ام هم استفادوا منك اكثر؟

والله الاتنين
انا بفيدهم فى حاجات وبتعلم منهم فى حاجات تانية

51- علاقتك بالمحشى .
ايه اخبارها ؟

زى الفل

52- البرنامج اليومى
بتاعك ؟

انام وأروح الكلية واجى انام واقعد أذاكر لحد بليل لحد ما انام تانى

طبعا فى ترفيه وسط المذاكرة يعنى أكل ونت

53-اكتر عضو خنقك فى
المنتدى ؟

مفيش حد

54- تعمل ايه لو كسبت
مليون دولار ؟

منا قولت قبل كده الموضوع
وهقوله تانى علشان خاطرك
اول حاجه هعملها هروح أحج انا واهلى
وبعدين هشترى عربية بى ام
وبعدين اعمل حاجه حلوة لاهلى وبلدى مش عارف هيا ايه بالظبط

55-تعمل ايه لو انت
وزير الماليه ؟

مش عارف والله بالظبط بس مش هاخد الفلوس وأهرب

56- تعمل ايه لو انت
عضو مجلس شعب ؟

هساعد أهل بلدى

57- ماركه السياره ال
نفسك تركبها ؟

BMW

58- احب الاسم لولد و
بنت الى قلبك ؟

محمد و ندى

59- متى تتعصب؟

لما حد يضايقنى

60- متى تفعل عند
اختلافك مع احد ؟

ده تبع الحد
بس عامة انا مبضايقش انا بقول دى وجهة نظرة وهوة حر فيها

61- هل انت سهل
الاقناع؟

مش علطول

62- هل انت مشترك فى
منتديات اخرى ؟

اه كتير

63- هل انت جرى فى
الطبيعه ؟

مش قوى

64- ممكن تقول لنا بعض
صفاتك الحلوه – و الوحشه بالمره ؟

هههههههههههههههه

اقولك مفيش حد بيقول على نفسه حلو وبيكون حلو
ولا فى حد بيقول على نفسه وحش وبيكون وحش

الذكى اللى عامل نفسه ذكى ميبقاش ذكى والغبى اللى عامل نفسه غبى ميبقاش غبى

65- هل اصبت بالاحباط ؟
و لماذا ؟

لا

66- مذياعك المفضل ؟

الراديو يعنى

FM

67- لاعب الكوره المفضل؟

ابو تريكة وعمرو ذكى فى مصر

وجيرارد ....ليفربول

68 – شخصيه سنفاويه
تحبها و تحترمها ؟

أبويا
والناس الكبيرة كلها طبعا

69- افضل لاعب فى سنفا؟

أحمد جمعه

70- اوفى صديق لك – و
لماذا ؟

كلهم اصحابى

71- هل صدمت فى احد قبل
ذلك ؟

اه كتير

72- هل لديك اى
موهبه – و فى اي مجال ؟

مش عارف بصراحه

73- بتحب شغل مدنى – و ال
مش فرقه كتير ؟

لا انا حبيته مستحدثا

74- اخبارك مع الرسم فى الكليه؟

زى الفل

75- التيرم ال انت فيه
دلو قت تقيل و ال كويس ؟

لا مرتاح الى حد ما

76- عملت ايه فى المد
تيرم ؟

والله الاسبوع الجاى

77- افضل مرجحله دراسيه
مرتك عليك ؟

الابتدائية

78- ماهو المهم و ما هو المهم لديك ؟

المهم انى أتجوز

79- مع المصباح السحرى
لك تلات امنيات ماهى ؟

أخلص
أشتغل فى مكان كويس
أخطب

80- شكلك مدمن العاب على الكمبيوتر ؟

لا مش قوى

81- شى تحس بالراحه
النفسيه عندما تنظر اليه ؟

المصحف

82- مكان تحن اليه ؟

المسجد

83- مدينه او بلد تود
زيارتها ؟

السعودية

84- انسان مستعد تضحى
بحياتك علشانه ؟

أبويا وامى ومراتى

85- احب شخصيه الى قلبك؟

أبويا وامى والى هخطبها انشاء الله

86- حد نفسك تعزمه – او
يعزمه ؟

عبد الغفار نحله ( ده صاحبى فى الكلية)

87- لونك المفضل ؟

الأسمر

88- اخر مره ضربت فيها حد ؟

انا مبضربش

انا بضرب

89-سوال كنت خايف انى اسالهولك ؟

90- سوال كنت متوقع انى اسالهولك ؟

91- انت بتذاكر طول التيرم وال اخر شهر ؟

92- انطباعك عن الامتحانات الشفوى و العملى ال فى الكليه ؟

94- نكمل وال كفايه ؟؟؟؟؟؟؟؟؟؟؟؟؟؟؟؟؟؟

بايونير اهلا بوجودك على كرسي الاعتراف
اليك اسألتي:
ايه الشخصية اللي دخلت حياتك وغيرتها سواء سلبي او ايجابي؟؟
واذا كنت في موضع الاختيار بين الحب والصداقه هتختار ايه؟؟
لو زوجة المستقبل طلبت منك البعدعن اهلك لانهم سبب مشاكل بينكم هيكون رد فعلك ايه؟؟
المنتدى ناقصه حاجات كتير ..في رأيك ايه اللي يكملها؟؟
لو كنت تقدر تختار نوع اول ابن ليك هتختار بنت ولا ولد وليه؟
في رأيك الحب رواية ام قصة قصيرة ام قصيدة؟؟
ايه الاصعب خيانة حبيب ولا خيانة صديق؟
قلت كلمة بحبك لكام بنت؟؟وكام مرة كانت صدقا من قلبك
هل تمنيت الموت في يوم من الايام وليه؟؟

طيف يتلألأ ضياءه فى سماء ملتقانا

شخصية عزيزة على قلوبنا جميعا...
قلم مضىء ...

قلم هادف...
شعلة من النشاط والحيوية فى المنتدى
فى كل الاقسام له بصمة.. بمواضيعة ومشاركاته

سوف اطرح عليك بعض الاسئلة البسيطة

أمنيه تحققت ؟؟

وأمنيه لم تتحقق؟؟

ماذا تعني لك هذه الكلمات

القمر ؟

الشمس ؟

النجوم ؟

السماء ؟
العاصفة ؟
الهدوء ؟

ماهو الشئ الذي بتخاف منه ويشغل بالك اكثر من بقيت الاشياء؟

* ما هو اسعد خبر تلقيتيه فى حياتك؟

هل الأم قـــــــــــــد تكون مقاما ً يسد
رحيــــل الاب ؟

ايهما اصعب الرحـــيل ام الفـــــــراق؟
_ لو عندك مصباح علاء الدين وطلع لك خادم المصباح
وقال لك شبيك لبيك ....... يا ابو الكرم عندك ثلاث امنيات اقدر احققها لك هذة اللحظة !
ماهذه الامنيات السوف تختارها

_ ما هي سلبيات المنتدى برايك ؟. وكيف يمكن تجاوزها ؟

-عضو سئ بالمنتدى ماتوقعة منه هذا السؤ وارجو ذكر هذا السؤ ؟

-اعضاء تعتبرهم من افضل المبدعين وبكل صراحه وجرائه ؟

وبلاش ذكر اسمى فيهم

اكمل يابيونير والارايك ايه على العموم ايا كان رايك برضو هكمل
ايه الحاجه اللى كان نفسك تعملهاومعملتهاش واللى مكنش نفسك تعملها وعملتها
الحب من وجهة نظرك خيال \ حلم \ واقع \ وهم
لو كنت بنت دة طبعا بعد ازنك ايه اكتر صفة تحب تكون فيك واكتر صفة تكره تكون فيك
كان نفسك تدخل كلية شباب وبنات والا كدة كويس وليه

تعمل ايه لو
حد اتهمك ب \الغباء \الخيانة\الانانية
واحدة معجب بيها قالتلك مبحبكش
واحدة بتحبها قالتلك مبحبكش
اترشحت رئيس جمهورية
وخلى بالك عشان الحيطان لها ودان ومحدش ركبلها حلءان
لو طلبت منك اسم العضو اللى هترشحه تقول ولو انى عارفه كويس
لو طالع رحلة وهتاخد 3حاجات بس معاك سواء اشياء او اشخاص هيكونوا ايه
طب لو 5
كفاية كدة عليك شوية الاسئلة السهلة دى والاجر والثواب عند الله
اى خدمة

ايه ياجماعه هوة مفيش حد اتحط ع الكرسى ده غيرى ولا ايه

ع العموم انا هجاوب على أسئلة كل واحد لوحده فى رد تسمحولى يعنى علشان الردود متتلغبطش

هنبدأ بانجنير

89-سوال كنت خايف انى اسالهولك ؟

هبقى أقولهولك بينى وبينك فى رساله خاصه

90- سوال كنت متوقع انى اسالهولك ؟

هوة نفس السؤال اللى كنت خايف تسئلهولى

91- انت بتذاكر طول التيرم وال اخر شهر ؟

طول التيرم ومطحون
بس ده ميمنعش انى انا برفه عن نفسى وفسح شوية مع المذاكرة

92- انطباعك عن الامتحانات الشفوى و العملى ال فى الكليه ؟

بالنسبة لأيه بالظبط الصعوبة بتعدى الحمد لله

94- نكمل وال كفايه ؟؟؟؟؟؟؟؟؟؟؟؟؟؟؟؟؟؟

والله الى انت شايفه بس انا بقول كفايه كده انا تعبت