قصه تمام ولا الافلام

هاي هذي اول مشاركه لي هي قصه كويتيه وبحطها لكم على أجزاء اذا ما عجبتكم قولوا عشان ما اكملها
------------------------------------------------------------------------------------------------------------------------------------
أبطال القصة
سمر : بنت حلوة وعليها حركات صبيان لأنها البنت الوحيدة من بين 3 صبيان ..
يعقوب : ولد عم سمر حلو ومغرور وميت على سمر ..
سارة : إخت يعقوب الحلوة وصديقه سمر ..
حمد : ولد عم سمر وسارة اللي راد من السفر ..
حمدان : أخو سمر الكبير عاشق سارة ..
مشعل وناصر بعد إخوان سمر ..


(((((الجزء الأول)))))

صبحيه يوم اليمعة الكل كان نايم في بيت بو حمدان .. ماعدا سمر اللي تاخذ راحتها بعيد عن إخوانها عشان تمارس رياضتها اليومية كرة السلة .. سمر البنت الأولى بعايلة بوحمدان اللي معروف عنه بأبو الشباب من كثر الصبيان اللي عنده " لا اله الا الله " أمها نجاة البحرينية الأصل تزوجت من أبو حمدان قبل 25 سنة يوم كانوا يدرسون مع بعض في مصر .. حبوا بعض من أول نظرة وما قدروا إنهم إلا يتزوجون .. وإنتقلت نجاة مع زوجها الكويت بعيد عن أهلها ..

الشمس للحين ما جاست حرارتها الأرض وسمر فرحانة حيل بالجو ويالسة تتنقز وتنقز الكورة وياها وهي تقول في خاطرها .. لا يوبا اليوم لازم لازم ألعب وياهم مو على كيفهم .. لمتى لازم أتحمل ثقل دم حمدانو ومشعلو وأخليهم دايم ينفذون فيني مقالبهم!!

وظلت تتدرب ليما دقت ساعتها الإلكترونية بموعد قعدة أمها .. ولقفت الكورة وقامت تراكض بعمرها عشان تلحق على غرفتها قبل لا يشوفها أحد .. للأسف الشديد الوالدة كانت صاحية وقاعدة بالصالة تشرب شاي الصبح .. وتهز ريلها لأنها تدري إن بنتها للحين على حركاتها " الصبيانية" على حد تعبيرها .. بس سمر اللي ماعطة أمها إقنور .. على فكرة سمر ما تتكلم عربي عشان تقهر أمها ..

" إنتي ما تيوزين " أوووووووووووف" قالت سمور في خاطرها بدت محاضرة يوم اليمعة .. المشكلة إن سمر حافظة هالمحاضرة بالتفصيل الممل .. وحافظة المقطع اللي ينزل فيه أخوها ناصر اللي هو توأم سمور بس ما يتشابهون على الرغم من علاقتهم القوية مع بعضهم البعض .. يوم نزل نصور ظل مكانه واقف عند الدري وهو يضحك على إخته وشكلها الملان من كلام أمها وما تدري شنو تسوي .. وإلتفتت حق نصور اللي مو شايل روحه من الضحك والكركرة على سمور المسيجينة وهي يالسة تتوعد فيه وتقول له بصوت واطي ما ينسمع"بوريك يالدب بوريك" وهو راح فوق عشان ينادي إخوانه عشان تكمل التطميشه عليها .. ويوم نزلو الشباب إنصدموا بأبوهم اللي كان قاعد بالصالة وسمور الدبة تتدلع عليه ..

حمدان أكبر الإخوان أول من سلم على أبوه وحب راسه ويده ويلس حذال أبوه بعد ما شبع من مرافس سمور المسيجينة عشان تتباعد شوي .. وهو يقول لها "خفي دلع يالدبة" ردت عليه سمور "إنت مو شغلك يا ويه البطة لا تتدخل ياملغك" وقامت سمور وهي تتحدى إخوانها كلهم .. سمر "اليوم إنتو زهبو حالكم حق أكبر فوز ياإخواني الأعزاء لأني راح أشارككم في اللعب مع عيال عمي يوسف وعمي سليمان" .. الكل سكت ومرة وحدة إنفجروا كلهم الشباب بالضحك .. ووقف مشعلو أكبر مليغ بالعايلة وهو يحاربها .. مشعل"إنتي شفيج جذي وايد تتلزقيين بالرياييل لايكون ريال وإحنه ماندري؟! لاتحلمين يا بعد قلبي لأن ماكو لعب وكافي عااااااااد صار لج دهر وإنتي دوم تهددينا بهالموضوع وماردج تنثبرين مكانج يم راما الخدامة" .. سمر "إنت ماتقول من وين لك هالملغ" وإلتفتت صوب أبوها اللي يالس يضحك من قلب عليها .. سمر "يوبا شوف ولدك هاذا الجيكر ما يخليني ألعب وياهم" .. الأب "يوبا مايصير تلعبين ويا الشباب إنتي بنت حلاتج مثل بنت عمج سويرة يحليلها كل الأنوثه فيها "سمر "أووووووووووووف آنه هاذي سارو ما أدانيها ولا تقعد تقولي تشبهي فيها يوبا .. متى راح تفهم إني يونيك" حمدانو "قلبي ويهج زين قال شنو قال يونيك .. إنتي فهمي معناتها يوبا بعدين تحجي" .. سمر "آنه أعرف معناته مو مثلك ياللوووووووووح ما تعرف الـ yes من الـ no" ..

نصور وهو حذال حمدان وهو ناوي نية على إخته "آنه أقول لج الـ yes والـ no حقت أخوي no لعب و yes حقران لج هههههههههههههههههههههههههه" ويلس الكل يضحك عليها وهي منقهرة حييييييييييل منهم ويلست تكمل دلع على أبوها .. سمر "يوبا شوف هالبط هاذولي ولا واحد فيه خير يالسين يتعافرون وياي مو من شي من الخوف إنهم يغلبون كبديل عن كل يمعة جدام يعقوب ورشود" .. وهي تتدلع أكثر "يوبا حبيبي تكفى عاد عاد أحبك آنه .. محد يحبك كثري .. تكفى يوبا طلبتك" .. الأب "إنزين يله عاد ساح نصج وإنتي تتدلعين" .. كمل كلامه وهو يحاجي الشباب "يله ياعيال خلوها تلعب" ..

الشباب كلهم بصوت واحد "تكفى تكفى يوبا شنو نلعبها" .. حمدان "هاذي أصلا تفشلنا جدام عيال خالي وعمي .. شنو بنت تراكض ويانا" .. مشعل "إي يوبا شنو خبلة هاذي بتمشي خبالها عليك .. لا يوبا إنت أكبر من جذي" .. نصور "إي نعم هاذي أكبر خبلة يوبا لا تمشي كلامها عليك" .. سمر "نصور أوريك يالخاين أن كلمت النسرة زينو عنك هاذا ويهي" .. مشعل "تكفين عاد ويا ويهج" .. نصور "أصلا آنه مو محتاجج يالخبلة .. كفاية إني أتكشخ وأركب سيارتي وأيي صوب مدرستكم وأخبل رفيجتج هاذي وأخليها تستخف بالهدة .. لذا لا تقعدين تهددين" .. الأب "يلة عاد كافي ياعيال وإنتي ياسماري حبيبتي فظيها سيرة يعني كل مرة لازم تعلينا بهالسالفة" .. سمر عاد بوزت ونزلت البراطم من القهر وهي تقول لأبوها "يا ريتني ولد .. جليلة حظ آنه والله لكن إنتو ياقوم البط بيي اليوم اللي بتتوسلوني ألعب وياكم لكن اللي يوافق" .. وكملت كلامها وهي تركض على الدري وحابسها دموعها من القهر لأن ماعندها رفيجة تشكي لها همها ومشاكلها ..

وصلت العوايل كلها .. يوسف بويعقوب أول من وصل وياعياله سارة ويعقوب وراشد اللي ما يفصل بينهم بالعمر إلا سنة ونص .. بس تحس يعقوب أكبر من راشد بوايد لأن يعقوب أضخم وايد من راشد الضعيف ووايد أوسم منه من جذي شايف حاله على قولة سمر .. وعمها سليمان وصل معاه ولده وليد وبنته الصغيرة رغد اللي لازم تتهاوش على الغدا مع سمور على طريقة لبسها .. وأخيرا عمتها زاهية وصلت مع زوجها مبارك اللي للحين الله ما عطاهم الذرية ومع ذلك عايشين أحلى عيشة مع بعضهم مو هامهم شي ..

يلسن الحريم مع بعض بالصاله الجبيرة والرياييل بالصالة الثانية وطبعا سمر معاهم .. حتى إن سارة بنت عمها المسيجينة اللي بتموت وتكون علاقة وياها قعدت وياهم مع إنها تستحي من عيال عمها اللي ماكلينها أكال بعيونهم وكلامهم الحلو عنها .. وهي ماتقدر ترد عليهم بس هي وايد تحب سمر ووايد تحلم إنها تكون رفيجتها مع إن فارق السن بيناتهن ماهو بجبير .. بس سمر تعتبر سارة وايد دليعة وبطة ..

الحوار بين الأب والعمين والنسيب هاذا هو ما يتغير عن السياسة .. وفكرة بوحمدان إنه يرشح حاله لمجلس الأمة وأخوه يوسف اللي يوافقه ويشجعه إنه يشارك وسليمان ومبارك معارضين حق الفكرة .. والشباب هاذي هي سوالفهم والتخطيطات حق السفر بالعطلة الجريبة .. قام بوحمدان قطع الفوضى اللي صايرة بسؤاله حق سليمان "بو حمد إلا ما قلت لي شخبار حمد ولدك والله له وحشه من زمان ما سمعنا عنه شي شخباره شعلومه" .. هني سمور إرتجفت وخلت الأكل من يدها وعينها بدت تلمع .. حمد ولد عمها .. الله صار لها فترة ما شافته من يوم ماراح أميركا حق الدراسة قبل 3 سنوات وللحين ما شافته .. هو أكبر منها بـ3 سنوات بس هي دايم تحس بمشاعر غريبة تجاهه .. وحست إنها وايد تعزه غير عن إخوانه لأنه كان طيب حيييييييييييل ووسيم بشكل كبير .. حتى إن حمدان ويعقوب يغيرون منه مووووووووووت وما يدانونه ..

طلعت سمور حالها من حالة الغيبوبة وهي تتذكر ويلست تسمع آخر أخبار حمد .. بو حمد "والله شاقول لك يابوحمدان .. الولد متوله يبي يرد الكويت ودايم يسلم عليكم وولهان حيل لأمه بس شنسوي المدرسة والدراسة ماخذة وقته كله .. وهو بعد يدرس بالصيف عشان ما يقزرها سبع سنين هناك .. وإن شالله بيرد بعد 6 شهور" .. سمور ماصدقت عمرها ووقفت من الفرحة وهي تعيد كلام عمها "6 شهور .. حمد بيرد بعد 6 شهور كلولولولولش" .. ويلست تيبب وإخوانها ماتو من الضحك عليها ومو قادرين يشدون حالهم .. ويعقوب أول من إستلمها .. يعقوب "إنتي يالرقلة شفيج نقزتي جذي اللي يشوفج يقول عاضتج جرادة ولا نحلة .. خرعتينا ماتيوزين إنتي عن هالحركات" .. سمر "طالع هاذا .. إنت يا ملك البط .. ويعقوب إنصدم من اللقب .. ما تسكت زين .. آنه ادري فيك إنت وحمدانو أخوي ما تدانون حمد ليش إنه وااااايد أحسن منكم .. ولا تقعد تتغشمر علي وياخشتك تراني للحين ما قلت حق خالتي عن سواياك بالشارع ذيج الليلة" .. سارة ضحكت هالمرة من شكل يعقوب اللي إنقلب من الضحك إلى البرود والغباء لأنه يدري عن شنو تتكلم هالسوسة سمور .. وسكت عنها وقال لها بصوت واطي "أوريج يا سحلية البيت أوريج" .. سمور ما عطته ويه خير شر وهي تسكت فيه "يلة يلة لاالحين أقلبها هوشة هني .. ها عمي شرايك" .. بويعقوب "يابعد قلبي خلج من هالشباب والله راح تدوخين وياهم .. كافي بالبيت وياسارو هم إنتي هني .. تكفين ياحبيبة قلب عمج خليهم عنج أحسلج" .. سمر ماقعدت وكملت دربها ووراها بنت عمها سارة .. والشباب يزقرونها "وين رايحة يابنت العم خلج ويانا عن هالسحلية" .. وهني سارو إفتشلت وقالت "ماكو بنات مالي قعدة وياكم" وراحت بسرعة عن لاتسمع أكثر وتموت من الفشيلة .. بعدين وهي تقول في بالها .. الله ياخذ بليسج ياسمور والله فشلتيني ..

بين حمدان ونصور سارة كانت محور كلامهم .. حمدان "فديتها بنت عمي شنو حلوة" .. نصور "هايالسيمباتيك اشوفك تقردنت" .. حمدان "أووووووف ياخوي إني صج صج تقردنت بس مادري اخاف ابوي مايرضى" .. نصور "صل على النبي وين تحصل لها على سيمباتيك مثلك .. شكل وكشخه ورزة ولا سيارة" .. حمدان "تتمصخر وياويهك انت يالهيلق" .. نصور "هههههههههههه لا ياخوي بس آنة ماقول إلا الحق" .. حمدان "شرايك أقط القنبلة على أبوي بعد الغدا" .. نصور "قطها شعلينا إحنه هاذا نص دينك ياريال" .. حمدان "وإنت الصاج يالسحلية" .. نصور "بالتوفيق" .. حمدان "الله المستعان" ..

الكل تغدى أحلى غدى والكل مدح طباخ أم حمدان .. وسمور اللي من يوم ما سمعت خبر ولد عمها مادانت الغدى وبغتها من الله عشان يخلص الغدى وتروح دارها عشان تفكر فيه هناك على راحتها .. لكن اللزقة سارو مو راضية تفج عنها واليوم سمور كلش مالها بارض حق سوالفها .. وقالت بينها وبين نفسها "اليوم إن أصرت علي أروح وياها المجمع بشق حلجها" .. لكن سارة فطينة فهمت إن بنت عمها تبي تيلس لحالها شوي وخلتها وقعدت مع خالاتها وتشاركهن السوالف عن الإستعدادات حق زواج إخت زوج زاهية .. وسمور راحت غرفتها أول ماركبت سمور لدارها قفلت الباب عليها وقامت ترقص وهي تغني "ياحلوكم ياحلوكم شوفو شوفو ياحلوكم مافي مثلكم يا هلي الله يحفظكم" وهي ترفع برواز من فوق المكتب فيه صورة عائلية حق العايلة كلها يوم كانو مسافرين الأردن قبل 3 سنين .. وكانت سمور صغيرة بذيج الرحلة عمرها كان 13سنة وبالصورة كانت واقفة حذال حمد اللي كان لامها حييييييل عشان تطلع بالصورة وهي كانت تضحك من قلب لأنها من ذاك الموقف وقلبها يدق لحمد ..

بعد دقايق وهي ترجع بذكرياتها تذكرت حمد عايش بأميركا .. معناته هو تفكيره راح يكون غير وتصوراته عن بنت احلامه راح تكون غير .. ويمكن ويمكن .. لكن لالالا ماكو مثل حمد .. حمد أصيل ويحب الأصالة ويموت على الرقلة والرباشة الزايدة .. وكان دوم يقول لها قبل لا يسافر "خلج مثل مانتي أحلى رقلة شفتها بحياتي" .. وقامت وقفت يم البلكون وهي تقول بكل نعومة ورومانسية "الله يردك بالسلامة ياحمد" ..

بعد خمس دقايق سمعت دق قوي على باب غرفتها وهي إخترعت من الزين وسمت بالرحمن وفتحت الباب وشافت أخوها نصور .. سمر "نصور ويعة شفيك خرعتني يالأهبل" .. نصور "لايفوتج بدت اللعبة" .. بوزت سمور عاد ونست فرحتها من شوي وقالت "وإذا إنتو ماتبوني ألعب وياكم ليش تناديني" .. نصور "يلة عاد سموري حبيبتي نتغشمر وياج كاهو يعقوب اللي قال لي روح ناد إختك" .. سمور عاد تشققت من الفرحة "إحلف" .. نصور "يلة عاد وياويهج بسرعة تعالي" .. سمور متشققة من الوناسة "إطلع برع زين عشان أبدل ثيابي" .. نصور "كويك ياسحلية" .. سمور "إقلب ويهك زين" ..

بدلت سمور ثيابها عشان تقعد وياراما مثل ماقالو لها وهم يتطمشون عليها ويلعبون .. لكن الله راواهم يوم ما قطع أبوها اللعب وقال لهم "الناس مغرب روحو سبحو وتزهبوا حق الصلاة" .. والكل قام يتأفأف ويقول إن شاء الله من غير نفس إلاسمور اللي قالت لهم "بره بره بره" .. والكل هد اللعب وراحو يلحقونها عشان يطقونها وهي تشرد عنهم والكل يضحك وفرحان ومتنوس والدنيا مو سايعته
----------------------------------------------------------
يلا ابي ردودكم عشان احط الجزء الي بعده

مرت الشهور الثلاثة الأولى من خبر ردة حمد بسرعة .. ومرت معاها الإمتحانات اللي أبدعت فيها سمور .. سمر على شطانتها إلا إنها كانت وايد شاطرة .. بس ماتحب ترافج أحد ولاتحب ولاأبله .. همها دراستها اللي كانت تشغلها عن كل هالأمور .. طبعا كانت تقلد على حمد بالشطارة ..

خلصت الإمتحانات ونجحت سمر ويابت معدل مرتفع مثل كل مرة .. ومثل كل مرة سقطت نصور في المواد اللي دايما يخاف منها .. وسمر تحب هالفترة لأنها تنمدح جدام العايلة ونصور يلقى له الزف والهواش والعقاب اللي دايما ينحاش منه بعد ما يتدلع جدام أمه ويبدي مسرحية الملل اللي ملل البيت منها ..

يوم اليمعة اللي فات الغدى كان في بيت العم بويعقوب اللي كان يبي يسوي مفاجأة حق ولده رشود اللي تخرج من الثانوية ويوريه السيارة اللي شراها حقه .. وبيت بويعقوب هو مزرعة أكثر من بيت لذا سمر تحب تروح هناك وايد بس سارة وملاحقها لها يخليها ما تروح وايد ..

كانت سمر يالسة عند البرجة وتسمع الإذاعه بالتلفون وأغنيه تقطع القلب .. تغني ويا المغني "جالس لحالي ولحالي .. هزني الشوف وذكرتك .. يعني معقولة ياغالي .. كل هذا وما وحشتك .. غيبتك طالت ليالي .. ياعسى خير وعذرتك" .. سمر ماكانت تدري بالعيون اللي كانت تراقبها وهي رايحة فيها بالأغاني .. ذيج العيون كانت نفس العيون اللي تطالعها من يوم ما كبرت سمر وبدت ملامح الجمال تظهر عليها بوضوح .. محد غيره .. المتوله عليها ((يعقوب)) اللي أكبر من سمر بـ 6 سنين .. وكان لين يفكر فيها يستحي ويقول في خاطرة هاذي بحسبة إختي الصغيرة ويلعن الشيطان ويشغل حاله بشي ثاني .. لكن هيهات تفارق سمر باله ..

سارة تلاحظ إعجاب أخوها المخفي بالطماشة والنقرشة ويا سمور .. وكانت تضحك عليه ليش إنه يكسر خاطرها ليما تشوف هالحركات منه .. وكله تدعي له لين تشوفه يطالع سمر بذيج الحنية والشاعرية "ربي تكون سمر من نصيبك ياخوي" ..

سارة اليوم كانت وايد عاقدة قرارها إنها تكون صداقة ويا بنت عمها الشيطانة لو شنو .. فراحت وقعدت يم سمور اللي كانت رايحة عليها ودموعها متيمعة بعينها .. وأول شي سارة ماكلمتها خلتها على راحتها وإنتبهت لها سمور بعدين وضحكت بويهها لأول مرة .. حتى إن سمر تعجبت من حالها ليش إنها ضحكت وياها .. فقالت في خاطرها "ليش مارافجها .. أحسن منها ماكو" .. أول من بدى الكلام هي سارة لأنها تعرف طبيعة سمر اللي الشطانة مغطية على خجلها ..

سارة "ها شخبار الناجحين؟! عسى مستانسة؟!" .. سمر "الحمد لله .. عادي" .. سارة بحيرة ماتدري شلون تحاجيها .. وتذكرت سالفة حمد وقالت في خاطرها "هياااا" .. سارة "هاشخبار إستعدادات يية حمد؟! .. نقزت سمر لأنها تخبر بنت عمها هي شنو مسوية من إستعدادات بس بسرعة فكرت ""هاذي شدراها عن إستعداداتي وشلي خلاها تسألني عن حمد بالذات" .. سمر تسأل سارة والحيا ماخذها "ليش هالسؤال بالذات" .. سارة وهي تبتسم أحلى إبتسامة "يعني إذا ماهتميتي حق موضوع حمد لمنو راح تهتمين" .. ويوم لاحظت خجل سمر الغريب كملت سارة بشجاعة أكبر "يابنت عمي آنة أدري إنج أكثر وحدة تعزين حمد من بعد خالتي أم حمد .. وهو بعد كانت واضحة معزته لج" .. سمر "صج والله؟! تهقين حمد يعزني مثل مانة أعزه" .. سارة "غلطان اللي يقول عكس هالكلام" .. سمر الدنيا مو سايعتها .. هي كانت تعرف إن حمد كان يعزها بس كانت خايفة إنه يحسبها مثل إخته أكثر من ماهي بنت عمه .. بس كلام سارة غير أشياء وايد ..

رد الصمت بيناتهم وسارة حست حالها عيزانة ما تدري تفتح أي موضوع وياسمر لأن سوالفها ما تعجب سمر .. وسمر وايد صبيانية بتفكيرها .. لكن قطعت سمر تفكير سارة وهي تناديها "سارة" .. سارة "نعم سمر" .. سمر مترددة ماتدري شلون تسأل سارة عن الموضوع .. سمر "سارة آنة بغيت أطلب منج طلبة بس .. بس كنت خايفة إنج ترديني" .. سارة "أفا عليج ياسماري .. ماعاش اللي يرد لج طلب .. إنتي طلبي وآنة أنفذ" .. سمر "وعد؟!" .. سارة "أيوة وعد" .. سمر"موتستغلين هالشي عشان تفشليني جدام الشباب" .. سارة"أفا عليج .. ماتعرفيني أعرق جدام عيال عمي ماعرف شلون أكلمهم هههههههههههههههههه" .. سمر"ههههههههههههههههه إي والله نسيت .. عيل بقول لج" .. سمر عدلت قعدتها وقابلت بنت عمها بعد ماكانت يالسة حذالها .. وسارة لاشعوريا حست إن السالفة جايدة ويلست نفس يلسة سمر .. سمر تكلمها بصوت واطي "أبيج تعلميني حركات بنات" .. سارة للحين ماستوعبت كلام سمر .. وبعد سمر "أبيج تاخذيني المجمع اللي دوم تتكلمين عنه عشان أشتري لي منه ثياب وأعدل من شكلي هذا .. وأشتريلي شوية أغراض بنات".. وسكتت سمر لأنها ماتصدق اللي هي قاعدة تقوله .. وسارة كانت شوي وتنقز من الفرحة على هالشي بس يودت حالها عشان بنت عمها تكمل .. سارة"أغراض مثل شنو؟!" .. سارة كانت تعرف سمر شنو تقصد بس مسوية حالها ماتدري عن شي .. وسمر بدت تعصب وتندم على اللي طلبته "خبرج خاتم .. ترجية .. روج مدري شنو" .. سارة تسوي حالها مستوعبة توها للكلام "آهااااااااااا .. قصدج مكياج وإكسسوارارت" .. سمر بدت تبتسم لأنها إرتاحت شوي "إي هذا هو" ..سارة قعدت تفكر شوي وجاوبتها "ماطلبتي يابنت عمي" .. سمر ما صدقت عمرها "صج والله" .. سارة "إي والله" .. سمر لا شعوريا حظنت بنت عمها لأول مرة وهي تقول لها "مشكورة سرسر والله فديتج محد مثلج .. آنة طول عمري أقول سارة وبس" ..

بيية يعقوب حذالهم .. قامت سمر غيرت شكلها ونبرة صوتها عشان ترد سمر القبلية وهي تقول "ويعقوبو ياكل خس" .. يعقوب توه بيقعد إستوى مرة ثانية في وقفته "إنتي ماتقولين لي يالسحلية آنة شمسوي فيج عشان آكل خس وياويهج" .. سمور "والله وتسأل بعد .. إنت اللي ياييب لي المرارة في مصاريني وياهالحركات" .. يعقوب"أي حركات حضرتج" .. سمور "لاتقعد تستهبل علي .. إنت تعرف عن شنو أتكلم" .. ويعقوب زاد من إستعباطه عليها "تكفين وياحلاتج ماعرف علميني" .. سمر تقربت من يعقوب اللي طار مخه من كثر مابنت عمه تخبله "لاتنسى هيفاءوه إللى للحين تسألني عن جاسم البغدادي" .. جف حلق يعقوب وبدى يطالع سمور بحقد "هاذي من وين تعرف هالسوالف .. منو يقول لها عن سوالفه ويا ربعها البنات" .. قام يعقوب وهني بينت سمر قزمة بطوله وهو يطالعها من فوق خشمه "إنتي ماتيوزين يالسحلية .. آنة شنو المفروض أسوي فيج اللحين" .. سمور عقدت إيديها على صدرها ونفخت روحها عليه وتطالعه من صوب عينها "ولاشي سوى إنك تاخذ بعمرك وتقلب ويهك عشان أكمل سوالف ويا بنت عمي وصديقتي" .. قلدها يعقوب "أوه أوه أوه من متى وإنتو ربع" .. سارة بغت تتكلم بس سمر قاطعتها "موشغلك" .. وقامت تطالع سارة وتقول "أصلا إحنه ربع من زمااااااان بس محد كان ملاحظ هالشي" .. يعقوب "آهااااااااااا بالمبارك عيل عليج إختي سارة .. والله يعينج يا سويرة على اللي بتلاقينه ويا هالنسرة" .. سمر "هااااااااااا بديت تدز حظك وياي" .. يعقوب "يلة يلة قلبي ويهج .. آخر زمن .. لاتخليني الحين أشيلج وأقطج بالبرجة" .. سمر "لوفيك خير سوها" .. يعقوب "ها ساروه .. أعقها" .. سارة وهي تضحك "لا صل على النبي شنو تقطها .. خلني آنة وياها .. صج إنك رزة ماتنعطى ويه يله إقلب ويهك" .. يعقوب "شفتي خربتج هالنسرة" .. سمر "نسرة إنت" .. يعقوب وهو يمشي عنهم "سحلية" .. سمر "سحلية إنت" .. يعقوب "ذكية" .. سمر "الذكي إنت" .. وفجت عينها سمر على آخرهم على المقلب اللي قطها ولد عمها فيه .. وخلاها وراح وهو يضحك عليها وقال "مايحتاي .. آنة من زمان ذكي" ..

سموور كانت معصبة ولو على بدها تذبح يعقوب . بس مسرع مانسته وردت حق بنت عمها عشان يخططون حق التشري
في ميلس البيت بوحمدان كان يالس وحذاله ولده حمدان اللي صار له شهر وهو يبي يفاتح أبوه عن موضوع سارة بنت عمه بس الحيا ماخذه .. ونصور الللي كان مطرب الناس بغناويه يطالع أخوه ويشجعه عشان يفتح الموضوع بس حمدان مو ماعطه ويه .. ونصور يغني ويعزف على العود ويقول "خليتني ما بين شكي وخوفي .. ارجع يا روح الروح الهجر ما يسوى .. خليتني ما بين شكي وخوفي" ومشعل رايحة عليه بالأغنية وهو يغني وياأخوه .. وعمامه صاخين من بعد الغدى إلا حمدان اللي كان يحترق ويقول لأبوه عن سارة ..

بعد ما سكت نصور راح يلس حذال أخوه وقال له "شفيك إنت صاير لي خواف" وحمدان جف ريجه من التوتر ورد عليه "إسكت واللي يرحم والديك آنه حدي موصل" .. نصور وهو ماسك بطنه عن لايضحك على أخوه "ياخوي والله ماهقيتك تطلع لي خواف .. يلة قول اللي في بالك وفكنا" حمدان قلب لونه ألآصفر وهو يطالع أخوه عشان يتنعز "مابتقوم ولاأشق حلجك" نصور وحمدان ظلوا يتهاوشون على خفيف ليما وعى أبوهم ..

الأب"عنبو داركم شفيكم إنتو الأثنين يالسين تتبسبسون مثل القطاوة والحريم .. ماتقولون لي ليش ماتفارجون" نصور الملقوف أول من بدى الكلام"يوبا أصلا أخوي حمدان يبي يتكلم وياك بكلمة راس بس مستحي" حمدان قلب ويهه أبيض مثل اللي صابين عليه ماي بارد "هااااا؟! آنا؟!" الأب "شفيك صفا ويهك" حمدان "ها ها يوبا" الأب"ياه ماتقول شسالفة" نصور الملقوف"يوبا السالفة ومافيها"ويطالع يمين ويسار يدور عمه بوحمد عشان يوطي صوته "أخوي حمدان يبيك تخطب سارة حقه" الأبو إبتسم بوسع حلجه وطالع حمدان "أيالخق صار لك شهر تتلصق فيني مو على شي .. أثاريك تبي بنت عمك سارة" حمدان بغى يغمى عليه من التوتر "إي يوبا تكفى طلبتك مابي البنت تروح من يدي" الأبو ضحك على ولده وهو يعدل من قعدته "تم وآنه أبوك باجر أكلم عمك بديوانية مبارك .. ولا يهمك ولا تشغل بالك"

حمدان ماسعته الدنيا بس نصور اللي قام على طوله يبوس راس أبوه "مشكور يوبا ماتقصر يعل عيني ما تبجيك" الأبو دز نصور عنه "الحين آنه أبي أعرف إنت اللي تبي سارة ولا حمدان .. إنت شكو .. طالع ملقوف على منو" حمدان وقف ويود أخوه من ذراعه عشان يطلعه من الميلس "والله مادري يايوبا هذا الملقوف طالع على منو" نصور يطالع حمدان بنظرة مسرحية "أفااااااااا الحين طلعت جذي .. صج إنك ماتستحي" حمدان ضحك عليه وطلعه وياه .. بس ناصر رد الميلس ينادي على مشعل وراشد عشان يطلعون ويابعض .. والكل مستغرب من حمدان اللي كان فرحان حيل من رد أبوه عليه

يتبع يا حلوين...

ارجوا ان تنال اعجابكم

انتظر الردود