اجعل كلامنا خفيف عليهم

إلى سيـادتــو

إلى سيادتو
اللي كعادتو
دايما يسيب الشعب يتكلم على راحتو

من واحد بسيط م الناس
من الشعب اللي سعادتك مشرّفنا برعايته
كل حاجة تمام
وكلنا ماشيين على الخط اللى لينا رسمتو
ياسيادتو

*********

فاكر الواد اليتيم اللي حكيتلك عليه
الواد اللي عربية السيراميك دهست ايديه
افتكرتو ؟؟؟
بيسلم على سيادتك كتير
وبيقولك ممنونين
رحنا بيه التأمين
وعملوله عملية على إيدين أكبر ممرضين
هه... الموجودين
والحمد لله
فاضله صابعين سُـلام ف إيديه اليمين
وادّوله وهوّه ماشى جاراميسين
وعلبتين فيتامين
من أبو اتنين جنيه
متشكرين
على التأمين
اللي سيادتك عملتو
ياسيادتو

*********

وصاحبى طارق اللى حكيتلك عليه مرّة
امبارح بعتلي صورته من بلاد برّه
وفيها مراته
اسمها كاترين
وعياله بسم الله بيض منوّرين
صاحبي قعد يحاول يخطب هنا تسع سنين
ولما ماعرفش.. هاجر
لعن أبو النسوان والدش وفتارين المتاجر
صرخ وقال أمشى قبل ما أكون زيّكو تاجر
أساوم على عرضى والإسم شبكة ومهر
أذل طالب الحلال
وأرفع الفاجر
وراح مهاجر
ما تزعلش منو
غصب عنو
شباب بقى ومستعجل
السكن الرخيص والإيجار الجديد ورخص تمن الحديد
هيه.. نهايتو
لسه كتير صابرين
مستنيين
الوعد اللي لينا وعدتو
ياسيادتو

*********

وعم أبو عطيّة
فرّاش المدرسة الثانويّة
قالي لما تشوف سيادتو تسلم عليه
الراجل دعالك بحرقة لحد ما احمرت عينيه
والله راجل طيب
وياما انحرم
راح طلعة الشهر اللي فات
يكشف قالولو عندك ورم
ولزمن لابد تعمل أشعة مقطعية
يحددوا نوع الورم وبعدين يعملو العملية
غلبان ياعم عطية
عارف الأشعة بكام يابيه
بمتين جنيه
منين ؟
ف مستشفى الحكومة ببلاش
لكن لازم ننتظر شهرين
واحنا لا ف ايدينا الوقت ولا القرشين
عملنا ايه؟؟؟
صبرنا
واحنا ف ايدنا حاجة غير الصبر
بس الموت هوه اللى مابيصبرش
بالأمر
وهناك فى القبر
هيعرفوه نوع الورم ببلاش
يعني كان هيلاقى منين يعمل العملية حتى لوكان عاش
أهي موتة كريمة أحسن من ذل السؤال
وعلى رأي اللي قال
الصبر للغلبان
والسجن للجدعان

*********

والبلد ليكو
جميع من عندنا بيبوس إيدين معاليكو

emaaaaaaaaaaaaaaaaaaaaaaad
اللهم إجعلنى خيراً مما يظنون
وإغفر لى ما لا يعلمون

</BLOCKQUOTE>

</BLOCKQUOTE>

</BLOCKQUOTE>

جامد ياعمده

» النساء تطلق عليهم الاجسام الرقيقه انا لارى ذلك ادخل وشوف؟
» الأهلي بدأ معسكر ألمانيا .. إصابة سمير بالتهاب خفيف في أكيلس والبدرى يطمأن على الدوليين وفتحي